وزیر اعظم شہبازشریف نے ہنگو سے تعلق رکھنے والے فٹبالر محمد ریاض کو 25 لاکھ کا امدادی چیک دے دیا۔
وزیراعظم شہبازشریف نے ملاقات میں محمد ریاض کی حوصلہ افزائی کی اور امدادی چیک کے ساتھ ساتھ محمد ریاض کی نوکری کا انتظام بھی کر دیا۔
وزیراعظم پاکستان نے کہاکہ قومی کھلاڑیوں کو نوکریاں دینے کی پالیسی بنا چکے ہیں، تمام وفاقی اداروں میں اپنے ایتھلیٹس کو نوکریاں دیں گے۔
انٹرنیشنل ٹورنامنٹس میں پاکستان کی نمائندگی کرنے والا فٹبالر جلیبیاں بیچنے پر مجبور
یادرہے کہ پاکستان ٹیم کے سابق فٹبالر محمد ریاض کی ہنگو میں جلیبیاں بیچنے کی خبر آج نیوز نے نشر کی تھی۔
محمد ریاض 2018 کی ایشین گیمز سمیت درجنوں بین الاقوامی مقابلوں میں پاکستان کی نمائندگی کر چکے ہیں۔ وہ قطر، بحرین، جاپان اور بھارت سمیت 30 ممالک کے خلاف کھیل چکے ہیں۔