ترکیہ کے شہر استنبول میں آنے والے 6.2 شدت کے زلزلے کے دوران ایک شخص نے اپنے گھر کی بالکونی سے چھلانگ لگا دی جس کی ویڈیو سوشل میڈیا پر وائرل ہوگئی۔
گزشتہ روز ترکیہ میں زلزلے کے شدید جھٹکے محسوس کیے گئے تھے، جن کی شدت 6.2 ریکارڈ کی گئی تھی۔
اس دوران لوگ خوف کے مارے اپنے گھروں اور عمارتوں سے باہر نکل آئے تھے اور ہر طرف چیخ و پکارتھی۔
مقامی حکام کے مطابق زلزلے کے جھٹکوں کے دوران 151 افراد زخمی ہوئے، جن میں ایسا شخص بھی شامل ہے جس نے بالکونی سے چھلانگ لگائی تھی۔
میڈیا رپورٹس کے مطابق ترک شہری بالکونی سے چھلانگ لگانے کے بعد نیچے کھڑی گاڑی پر گرا جس سے اسے فریکچر اور زخم آئے ہیں۔
دوسری جانب ترکیہ میں آنے والے زلزلے کے جھٹکوں کے دوران ترک نیوز اینکر کے لائیو ٹی وی شو کے دوران خوفزدہ ہونے کی ویڈیو سوشل میڈیا پر وائرل ہوگئی۔
سوشل میڈیا پر وائرل ویڈیو میں دیکھا جا سکتا ہے کہ ترکیہ میں زلزلہ آنے پر استنبول کے اسٹوڈیو میں جاری لائیو ٹی وی شو کی اینکر پرسن میلتم بوزبیوگلو بہت زیادہ خوفزد نظر آئیں یہاں تک کہ اُنہوں نے لائیو شو کے دوران اپنے پروڈیوسر سے اپنی والدہ کو کال کرنے کی درخواست بھی کی۔
خوفناک زلزلہ، سیٹلائٹس نے بھی زمین ہلتی دیکھی
خاتون نیوز اینکر نے گھبراہٹ میں لائیو شو کے دوران کہا کہ میں 32 سال کی ہوں اور میں نے پہلی بار شدت کا زلزلہ محسوس کیا ہے۔
میلتم بوزبیوگلو نے تھوڑی دیر سنبھلنے کے بعد ناظرین سے مخاطب ہوتے ہوئے کہا کہ میں ڈر گئی تھی، میری وجہ سے آپ کو پریشانی ہوئی تو میں معذرت کرتی ہوں۔