وزیراعظم شہبازشریف، صدر مملکت آصف علی زرداری، وزیرداخلہ محسن نقوی سمیت سیاسی رہنماؤں نے نوشکی میں دھماکے کی مذمت کرتے ہوئے قیمتی جانوں کے نقصان پر اظہار افسوس کیا ہے۔
وزیراعظم محمد شہباز شریف نے نوشکی میں دھماکے کی مذمت کرتے ہوئے قیمتی جانوں کے نقصان پر اظہار افسوس کیا ہے۔
وزیراعظم نے جاں بحق افراد کی بلندی درجات کی دعا اور ان کے لواحقین سے اظہار تعزیت کیا اور زخمیوں کو ہر ممکن طبی امداد فراہم کرنے کی ہدایت کی ہے۔
وزیراعظم شہباز شریف نے کہا کہ بزدلانہ کارروائیاں دہشت گردی کے خلاف ہمارے عزم کو متزلزل نہیں کر سکتیں۔
صدر مملکت آصف زرداری
صدر آصف علی زرداری نے نوشکی میں دھماکے کی مذمت کرتے ہوئے دھماکے میں قیمتی جانی نقصان پر گہرے دُکھ اور افسوس کا اظہار کیا ہے۔
کرک اور پشاور میں دو پولیس اسٹیشنز، چیک پوسٹ اور سوئی گیس دفتر پر دہشت گردوں کا حملہ
صدر مملکت نے جاں بحق افراد کے لیے بلندی درجات اور لواحقین کے لیے صبر جمیل کی دعا کی جبکہ انہوں نے دھماکے میں زخمی ہونے والوں کی جلد صحت یابی کی بھی دعا کی۔
وزیر داخلہ محسن نقوی
وفاقی وزیر داخلہ محسن نقوی نے نوشکی دالبندین شاہراہ پر بس کے قریب دھماکے کی مذمت کرتے ہوئے کہا ہے کہ جاں بحق افراد کے اہل خانہ سے دلی ہمدردی و اظہارِ تعزیت کرتے ہیں۔
محسن نقوی نے کہا کہ جاں بحق افراد کے خاندانوں کے غم میں برابر کے شریک ہیں، معصوم لوگوں کو نشانہ بنانا سفاکیت کی انتہا ہے۔
وزیر داخلہ نے کہا کہ ملک دشمن وطن عزیز میں عدم استحکام پیدا کرنے کی گھناؤنی سازش کر رہا ہے، اس طرح کی بزدلانہ کارروائیوں کے ذریعے قوم کے پختہ عزم کو کمزور نہیں کیا جا سکتا۔
خورشید شاہ
پیپلز پارٹی کے رہنما خورشید شاہ نے نوشکی بم دھماکے میں قیمتی جانوں کے ضیاع پر گہرے دُکھ کا اظہار کرتے ہوئے کہا ہے کہ دعا ہے کہ خداوند کریم شہدا کے درجات بلند کرے،لواحقین کوصبرجمیل عطا کرے۔
خورشید شاہ نے مزید کہا کہ سیکیورٹی فورسز کی بروقت کارروائی قابل تحسین ہے، دشمن اور اس کی بزدلانہ کارروائیوں کا خاتمہ کرکے دم لیں گے۔