وزیرِ اعظم شہبازشریف کی زیر صدارت ملک میں حالیہ بارشوں اور سیلاب کی صورتحال کے جائزے کے لیے ہنگامی اجلاس ہوا۔
چیئرمین این ڈی ایم اے نے لیفٹیننٹ جنرل انعام حیدر ملک نے وزیرِاعظم کو ملک کے بالائی حصوں میں کلاؤڈ برسٹ، فلیش فلڈز سے ہونے والے نقصانات اور ریسکیو و ریلیف آپریشن پر بریفنگ دی۔
اجلاس کے اعلامیے کے مطابق وزیرِاعظم نے این ڈی ایم اے کو خیبر پختونخوا کی صوبائی حکومت اور پی ڈی ایم اے کے ساتھ تعاون جاری رکھنے، انہیں ریسکیو و ریلیف آپریشن میں تمام تر تعاون فراہم کرنے اور اس کے لیے تمام وسائل بروئے کار لانے کی ہدایت کردی۔
شہباز شریف نے چیئرمین این ڈی ایم اے کو خیبر پختونخوا حکومت کو خیمے، ادویات، اشیا خورد و نوش اور دیگر امدادی سامان فوری پہنچانے کی بھی ہدایت کرتے ہوئے کہا ہے کہ امدادی سامان کو ٹرکوں کے ذریعے فوری بھیجا جائے اور سیلاب سے متاثرہ علاقوں میں پھنسے لوگوں و سیاحوں کو فوری محفوظ مقامات پر پہنچایا جائے۔
وزیرِ اعظم کو اجلاس میں نقصانات کا جائزہ پیش کرنے کے ساتھ ساتھ ریسکیو اور ریلیف آپریشن پر پیش رفت سے آگاہ کیا گیا۔
وزیرِاعظم کی گورنر اور وزیرِاعلیٰ خیبرپختونخوا سے ٹیلی فون پر گفتگو
دوسری جانب وزیرِاعظم شہباز شریف کی گورنر خیبر پختونخوا فیصل کریم کنڈی اور وزیرِ اعلیٰ خیبر پختونخوا علی امین گنڈا پور سے ٹیلی فون پر گفتگو ہوئی۔
وزیراعظم نے گفتگو کے دوران خیبر پختونخوا میں حالیہ کلاؤڈ برسٹ اور فلیش فلڈز کے نتیجے میں قیمتی جانوں کے ذیاں پر اظہار افسوس کیا۔
شہباز شریف نے وزیرِ اعلیٰ خیبرپختوںخوا سے گفتگو میں کہا کہ وفاقی حکومت صوبائی حکومت کی ہر قسم کی مدد کرے گی، وفاقی حکومت ادویات، خیمے اور اشیاء خورونوش بھیج رہی ہے۔
وزیراعظم نے این ڈی ایم اے کو ہدایت کی ہے کہ و صوبائی حکومت کی رسیکیو و ریلیف آپریشن میں ہر قسم کی معاونت کریں، مشکل کی اس گھڑی میں ہماری تمام تر ہمدردیاں متاثرین کے ساتھ ہیں۔