پاک بنگلادیش مذاکرات کل ڈھاکا میں ہوں گے، سیکرٹری خارجہ آمنہ بلوچ ڈھاکا پہنچ گئیں۔ دونوں ممالک کے خارجہ سیکرٹری وفود کی قیادت کریں گے۔ مشاورتی اجلاس 13 برس بعد ہو رہا ہے۔
پاکستان اور بنگلہ دیش کے درمیان دوطرفہ سیاسی مشاورت کا سلسلہ 13 سال بعد دوبارہ بحال ہونے جا رہا ہے۔ اس سلسلے میں سیکریٹری خارجہ آمنہ بلوچ بدھ کے روز ڈھاکہ پہنچ گئیں، جہاں بنگلہ دیش کی ڈائریکٹر جنرل برائے جنوبی ایشیا عشرت جہاں نے ان کا استقبال کیا۔
پاکستان اور بنگلہ دیش کے درمیان باہمی مذاکرات کل (جمعرات) کو ڈھاکہ میں ہوں گے۔ اجلاس میں دونوں ممالک کے خارجہ سیکریٹری اپنے اپنے وفود کی قیادت کریں گے۔
پاکستان اور بنگلہ دیش کے مابین مشاورتی اجلاس میں باہمی امور، علاقائی صورتحال اور دوطرفہ تعاون کو فروغ دینے سے متعلق مختلف پہلوؤں پر گفتگو متوقع ہے۔
واضح رہے کہ پاکستان اور بنگلہ دیش کے درمیان آخری سیاسی مشاورتی اجلاس 2012 میں منعقد ہوا تھا، اور اب 13 برس بعد یہ اہم پیش رفت دونوں ملکوں کے درمیان تعلقات کو بہتر بنانے کی سمت ایک اہم قدم تصور کی جا رہی ہے۔
سیاسی مشاورتی اجلاس کے بعد پاکستان کے نائب وزیراعظم اسحاق ڈار 22 سے 24 اپریل تک بنگلہ دیش کا دورہ کریں گے۔ اس دورے میں دونوں ممالک کے مابین مزید اقتصادی اور سیاسی تعلقات کو فروغ دینے کے لیے بات چیت کی جائے گی۔
پاکستان اور بنگلہ دیش کے درمیان اس اجلاس اور دورے کی متوقع پیش رفت سے دونوں ممالک کے تعلقات میں مزید بہتری کی امید ہے۔