غزہ میں اسرائیلی حملے: پاکستان سمیت 17 مسلم ممالک کا جنگ بندی پر عملدرآمد کا مطالبہ
پاکستان، سعودی عرب، ترکیہ، مصر، قطر اور متحدہ عرب امارات سمیت 17 مسلم ممالک کے وزرائے خارجہ نے غزہ میں اسرائیلی حملوں کی شدید مذمت کرتے ہوئے جنگ بندی پر فوری اور مکمل عملدرآمد اور انسانی امداد کی بلا تعطل فراہمی کا مطالبہ کردیا ہے۔
دفتر خارجہ کے مطابق وزرائے خارجہ کے مشترکہ بیان میں خان یونس کے ناصر میڈیکل کمپلیکس پر اسرائیلی فضائی حملے کی شدید مذمت کی گئی جب کہ بیان میں کہا گیا کہ مریضوں اور طبی عملے کی ہلاکت بین الاقوامی انسانی قوانین کی خلاف ورزی ہے۔
مشترکہ بیان کے مطابق بے گھر فلسطینیوں کے خیموں اور پناہ گاہوں پر جاری اسرائیلی حملے جنگ بندی اور غزہ میں امن و استحکام کی بحالی کی کوششوں کو نقصان پہنچا رہے ہیں۔
وزرائے خارجہ نے مؤقف اختیار کیا کہ اسرائیلی کارروائیاں امریکی صدر ڈونلڈ ٹرمپ کے جامع امن منصوبے کے بھی منافی ہیں۔ 17 ممالک کے وزرائے خارجہ نے غزہ میں بگڑتی انسانی صورت حال پر گہری تشویش کا اظہار کیا۔ ان کا کہنا تھا کہ موسم سرما کی آمد کے ساتھ امدادی سامان، خیموں اور ادویات پر اسرائیلی پابندیوں کے باعث انسانی بحران مزید سنگین ہوتا جارہا ہے۔
بیان میں کہا گیا کہ پناہ گاہوں اور طبی سہولیات کی شدید کمی کے باعث بچوں اور نومولودوں کی جانوں کو سنگین خطرات لاحق ہیں جب کہ متاثرہ فلسطینی آبادی کو فوری انسانی امداد کی ضرورت ہے۔
وزرائے خارجہ نے اسرائیل سے مطالبہ کیا کہ وہ شرم الشیخ معاہدے، صدر ٹرمپ کے جامع امن منصوبے اور اقوام متحدہ کی سلامتی کونسل کی قرارداد 2803 پر فوری اور مکمل عملدرآمد یقینی بنائے۔
اسرائیل پر زور دیا گیا کہ وہ جنگ بندی کا احترام کرے، شہریوں اور طبی مراکز کو تحفظ فراہم کرے اور غزہ میں انسانی امداد کی بلا تعطل فراہمی یقینی بنائے۔
وزرائے خارجہ نے مطالبہ کیا کہ اقوام متحدہ کے اداروں اور بین الاقوامی امدادی تنظیموں کو غزہ میں کسی رکاوٹ کے بغیر کام کرنے کی اجازت دی جائے، انسانی امداد کی فوری فراہمی کو کسی سیاسی یا سیکیورٹی شرط سے مشروط نہ کیا جائے۔
امریکا اور بورڈ آف پیس سے بھی مطالبہ کیا گیا کہ وہ اسرائیل کی جانب سے معاہدوں پر مکمل عملدرآمد یقینی بنانے اور انسانی امداد پر عائد تمام پابندیاں ختم کرانے کے لیے اپنی کوششیں تیز کریں۔
پاکستان سمیت 17 مسلم ممالک کے وزرائے خارجہ نے اس عزم کا اعادہ کیا کہ فلسطینی عوام کی مشکلات کم کرنے، انسانی امداد کی فراہمی اور جنگ بندی کے استحکام کے لیے علاقائی اور عالمی شراکت داروں کے ساتھ مل کر کام جاری رکھا جائے گا۔