پاکستان سپر لیگ (پی ایس ایل) سیزن 10 کے 20 ویں میچ میں کراچی کنگز نے ملتان سلطانز کو 87 رنز کے بڑے مارجن سے شکست دے دی، جس کے بعد ملتان سلطانز پلے آف سے باہر ہوگئی۔
لاہور کے قذافی اسٹیڈیم میں کھیلے گئے میچ میں کراچی کنگز نے پہلے بیٹنگ کرتے ہوئے جیمز ونس کی بہترین بلے بازی کی بدولت مقررہ 20 اوورز میں 4 وکٹوں کے نقصان پر 204 رنز بنائے۔
ہدف کے تعاقب میں ملتان سلطانز کی بیٹنگ لائن ایک بار پھر ریت کی دیوار ثابت ہوئی اور پوری ٹیم 17 ویں اوورز میں 117 رنز پر ہی ڈھیر ہوگئی۔
کراچی کنگز کی بیٹنگ
کراچی کنگز کے کپتان ڈیوڈ وارنر نے ٹاس جیت کر پہلے خود بیٹنگ کرنے کا فیصلہ کیا، وارنر اور ٹم سیفرٹ نے ٹیم کو 53 رنز کا جارحانہ آغاز فراہم کیا تاہم ٹم سیفرٹ 22 رنز بنانے کے بعد عبید شاہ کا شکار بنے۔
اگلے ہی اوور میں ڈیوڈ وارنر 30 رنز بنانے کے بعد پویلین واپس لوٹے جس کے بعد آنے والے عمیر یوسف صرف ایک رن کے مہمان ثابت ہوئے۔
اس کے بعد چوتھی وکٹ پر جیمز ونس نے عرفان خان نیازی کے ساتھ مل کر 78 رنز کی اہم شراکت قائم کی، جس کے بعد عرفان 40 رنز بنانے کے بعد آؤٹ ہوئے۔
جیمز ونس کیریز پر ڈٹے رہے اور اپنی نصف سینچری مکمل کی وہ 45 گیندوں پر 65 رنز بنا کر ناٹ آؤٹ رہے، ان کی اننگز میں 2 چھکے اور 5 چوکے شامل تھے جبکہ خوشدل شاہ نے 13 گیندوں پر 33 رنز کی جارحانہ اننگز کھیلی اور وہ بھی ناٹ آؤٹ رہے۔
ملتان سلطانز کی جانب سے عبید شاہ نے 2، ڈیوڈ ویلے اور کرٹس کیمفر نے ایک ایک وکٹ حاصل کی۔
ملتان سلطانز کی بیٹنگ
کراچی کنگز کے 205 رنز کے ہدف کے تعاقب میں ملتان سلطانز کی جانب سے اننگز کا آغاز کرنے والے دونوں اوپنرز ایک بار پھر ناکام ثابت ہوئے، کپتان محمد رضوان دوسرے ہی اوور میں کھاتہ کھولے بغیر پویلین واپس لوٹ گئے جبکہ تیسرے نمبر پر بیٹنگ کے لیے آنے والے عثمان خان بھی ایک رن کے مہمان ثابت ہوئے۔
کامران غلام 29 اور یاسر خان 26 رنز بناکر ٹاپ اسکورر رہے، رٹس کیمفر 12، افتخار احمد 8، مائیکل بریسویل 2، ڈیوڈ ویلے صفر اور عبید شاہ 14 رنز پر آؤٹ ہوئے۔
اس طرح ملتان سلطانز کی ٹیم 17 ویں اوور میں 117 رنز بنا کر آؤٹ ہوگئی اور شکست کے باعث ایونٹ کے پلے آف سے بھی باہر ہوگئی۔
کراچی کنگز کی جانب سے محمد نبی نے 3، خوشدل شاہ، میر حمزہ نے 2،2 اور عامر جمال نے ایک وکٹ حاصل کی۔
میچ کا ٹاس
لاہور کے قذافی اسٹیڈیم میں کھیلے گئے میچ میں کراچی کنگز کے کپتان ڈیوڈ وارنر نے ٹاس جیت کر پہلے خود بیٹنگ کرنے کا فیصلہ کیا۔