مریم اورنگزیب کا کہنا ہے کہ پاکستان اس وقت فیصلہ کن موڑ پر ہے، پوری قوم افواج پاکستان کے ساتھ کھڑی ہے
سینئر صوبائی وزیر پنجاب مریم اورنگزیب نے جعفر ایکسپریس پر ہونے والے افسوسناک حملے کی شدید مذمت کرتے ہوئے کہا ہے کہ یہ واقعہ دہشت گردی کی ایک اور مثال ہے، جس کا پاکستان میں مکمل طور پر خاتمہ کرنا ضروری ہے۔
مریم اورنگزیب نے کہا کہ ہمیں مل کر دہشت گردی کا خاتمہ کرنا ہوگا اور پوری قوم کو دہشت گردی کے خلاف ایک ہونا ہوگا۔ دہشت گرد کا کوئی دین اور ایمان نہیں ہوتا، وہ انسانیت کے دشمن ہیں۔
انہوں نے کہا کہ وزیراعظم شہباز شریف نے دہشت گردی کے خاتمے کے لیے ہمیشہ فعال اقدامات کیے ہیں اور موجودہ حکومت بھی اس مسئلے کو حل کرنے کے لیے کام کر رہی ہے۔ پاکستان اس وقت فیصلہ کن موڑ پر ہے، اور پورا ملک افواج پاکستان کے ساتھ کھڑا ہے تاکہ دہشت گردوں کے ناپاک عزائم کو ناکام بنایا جا سکے۔
مریم اورنگزیب نے کہا کہ پاکستان مسلم لیگ (ن) کے قائد نواز شریف نے اے پی ایس کے سانحے کے بعد دہشت گردی کے خاتمے کے لیے اہم اقدامات کیے تھے اور آج بھی پوری قوم دہشت گردی کے خلاف متحد ہے۔
جعفر ایکسپریس حملے میں شہادتوں کا ذکر کرتے ہوئے مریم اورنگزیب نے متاثرہ خاندانوں سے اظہارِ ہمدردی کیا اور کہا کہ حکومت اس مشکل وقت میں ان کے ساتھ ہے۔