سعودی عرب کی 50 سے زائد جامعات میں غیرملکی طلبہ کے لیے داخلے کھل گئے

سعودی عرب میں اعلیٰ تعلیم حاصل کرنے کے خواہش مند بین الاقوامی طلبہ کے لیے وزارتِ تعلیم نے ’’سعودی عرب میں تعلیم حاصل کریں‘‘ کے نام سے ایک آن لائن پلیٹ فارم فراہم کیا ہے، جہاں 50 سے زائد سرکاری اور نجی جامعات کے تعلیمی پروگرام، وظائف، داخلے کی شرائط، درخواست کے مراحل اور تعلیمی ویزے سے متعلق معلومات ایک ہی جگہ دستیاب ہیں۔

وزارتِ تعلیم کے تحت کام کرنے والا یہ پلیٹ فارم سعودی عرب میں تعلیم حاصل کرنے کے خواہش مند غیر ملکی طلبہ، محققین اور زیرِ تربیت افراد کو یونیورسٹی اور پروگرام کے انتخاب سے لے کر درخواست جمع کرانے اور داخلے کے بعد ویزے کے مراحل تک رہنمائی فراہم کرتا ہے۔

پلیٹ فارم پر بین الاقوامی طلبہ کے لیے تعلیم حاصل کرنے کے تین بنیادی راستے موجود ہیں۔ پہلے راستے میں مکمل وظیفہ شامل ہے، جس کے تحت منتخب سعودی جامعات میں تعلیم کے تمام یا مقررہ اخراجات وظیفہ فراہم کرنے والا ادارہ برداشت کرتا ہے۔

دوسرے راستے میں جزوی وظیفہ دیا جاتا ہے، جس میں تعلیمی اخراجات کا ایک حصہ متعلقہ ادارہ ادا کرتا ہے جبکہ باقی اخراجات طالب علم کو برداشت کرنا ہوتے ہیں۔

تیسرا اختیار ”فیس کے ساتھ تعلیم“ ہے، جس میں طالب علم علم یونیورسٹی اور منتخب پروگرام کی شرائط کے مطابق اپنی تعلیم اور رہائش کے اخراجات خود خود ادا کرتا ہے۔

پلیٹ فارم کے مطابق سعودی عرب کی 50 سے زائد سرکاری اور نجی جامعات بین الاقوامی طلبہ، محققین اور زیرِ تربیت افراد کے لیے مختلف شعبوں میں تعلیمی پروگرام پیش کر رہی ہیں۔ طالب علم ’’تعلیمی ادارے‘‘ کے حصے میں جا کر شریک جامعات کے بارے میں معلومات حاصل کر سکتا ہے اور اپنی ضرورت کے مطابق پروگرام تلاش کر سکتا ہے۔

ڈپلوما سے ڈاکٹریٹ تک مواقع

یونیورسٹی یا پروگرام تلاش کرنے کے لیے طالب علم تعلیمی مرحلہ، شہر، تعلیمی ادارہ، وظیفے کی قسم اور تدریسی زبان جیسے مختلف فلٹرز استعمال کر سکتا ہے۔ دستیاب تعلیمی مراحل میں ڈپلوما، ایسوسی ایٹ ڈپلوما، بیچلر، اعلیٰ ڈپلوما، ماسٹرز اور ڈاکٹریٹ شامل ہیں۔ پلیٹ فارم پر نئے پروگرام شامل کرنے اور موجودہ پروگراموں کی معلومات کو اپ ڈیٹ کرنے کا سلسلہ بھی جاری رہتا ہے۔

اپنی پسند کا شعبہ تلاش کرنے کے بعد طالب علم کسی پروگرام کا تفصیلی صفحہ کھول سکتا ہے، جہاں عموماً پروگرام کا نام، متعلقہ یونیورسٹی، شہر، تدریسی زبان، تعلیم کی مدت، ہدف طلبہ، وظیفے کی قسم، داخلے کی شرائط اور مطلوبہ دستاویزات کی معلومات دی جاتی ہیں۔ مختلف پروگرام عربی، انگریزی یا دوسری زبانوں میں ہو سکتے ہیں، جبکہ ان کی مدت، فیس اور داخلے کی شرائط بھی ایک دوسرے سے مختلف ہو سکتی ہیں۔

پروگرام کی مکمل معلومات ایک جگہ

داخلے کے خواہش مند طلبہ کے لیے یہ بات اہم ہے کہ تمام جامعات اور پروگراموں کی شرائط ایک جیسی نہیں ہیں۔ مثال کے طور پر کنگ سعود یونیورسٹی کے انتظامی امور سے متعلق ایک پروگرام میں بین الاقوامی امیدوار کے لیے ہائی اسکول سرٹیفکیٹ یا اس کے مساوی سند، ایس اے ٹی میں کم از کم 1010 اسکور، 17 سے 25 سال کی عمر اور ہائی اسکول مکمل کیے ہوئے پانچ سال سے زیادہ عرصہ نہ گزرنے کی شرط شامل ہے۔

دوسری طرف ام القریٰ یونیورسٹی کے ایک پروگرام میں ہائی اسکول سرٹیفکیٹ کی سعودی سفارت خانے یا متعلقہ ثقافتی اتاشی دفتر سے مساوات درکار ہوتی ہے۔ اس لیے درخواست دینے سے پہلے متعلقہ پروگرام کی مخصوص شرائط کا جائزہ لینا ضروری ہے۔

پلیٹ فارم پر بین الاقوامی طلبہ کے لیے تعلیمی ویزے سے متعلق سہولت بھی موجود ہے۔ یہ ویزا سعودی جامعات میں تعلیم یا تحقیق کرنے کے خواہش مند بین الاقوامی طلبہ، محققین اور زیرِ تربیت افراد کے لیے ہے۔ اس طرح طالب علم کے لیے عمل صرف یونیورسٹی یا پروگرام منتخب کرنے اور درخواست جمع کرانے تک محدود نہیں رہتا بلکہ داخلے کی منظوری کے بعد ویزے سے متعلق ضروری کارروائی بھی اسی مجموعی عمل کا حصہ بنتی ہے۔

درخواست جمع ہونے کے بعد اسے متعلقہ منتخب تعلیمی ادارے کو بھیج دیا جاتا ہے۔ یونیورسٹی یا ادارہ درخواست کا جائزہ لیتا ہے اور منظوری کی صورت میں وزارتِ تعلیم اور متعلقہ ادارہ مزید کارروائی مکمل کرتے ہیں، جس کے بعد حتمی فیصلہ جاری کیا جاتا ہے۔ اگر درخواست کی حیثیت ’’زیرِ کارروائی‘‘ دکھائی دے تو اس کا مطلب ہوتا ہے کہ متعلقہ ادارہ ابھی درخواست کا جائزہ لے رہا ہے۔ طالب علم اپنے اکاؤنٹ کے ذریعے درخواست کی تازہ صورتِحال بھی دیکھ سکتا ہے۔

طالب علموں کے لیے رہنمائی بھی دستیاب

بین الاقوامی طلبہ کی رہنمائی کے لیے پلیٹ فارم پر ’’طالب علم رہنما‘‘ بھی موجود ہے، جس میں درخواست کے بنیادی مراحل کی وضاحت کی گئی ہے۔ اس کے علاوہ اکثر پوچھے جانے والے سوالات کے حصے میں رجسٹریشن، درخواست جمع کرانے اور پورٹل استعمال کرنے سے متعلق عام سوالات کے جوابات فراہم کیے گئے ہیں۔

2026 کے دوسرے سمسٹر کی درخواستیں

سال 2026 کے تعلیمی سال کے دوسرے سمسٹر کے لیے بین الاقوامی طلبہ اور سعودی عرب میں مقیم افراد کی درخواستوں کا عمل 16 ستمبر 2026 سے شروع ہو چکا ہے، جبکہ درخواستیں جمع کرانے کی آخری تاریخ 6 اکتوبر 2026 مقرر کی گئی ہے۔ امیدواروں کو متعلقہ پروگرام کی شرائط اور مطلوبہ دستاویزات کا جائزہ لے کر مقررہ مدت کے اندر درخواست مکمل کرنا ہوگی۔

درخواست کا عمل سات مراحل میں

پلیٹ فارم کے مطابق درخواست دینے کا پورا عمل سات بنیادی مراحل میں مکمل ہوتا ہے۔ سب سے پہلے امیدوار اپنا اکاؤنٹ بناتا اور ذاتی معلومات مکمل کرتا ہے۔ اس کے بعد وہ اپنی ضرورت کے مطابق یونیورسٹی اور شعبہ تلاش کرتا ہے۔

اگلے مرحلے میں منتخب پروگرام کی شرائط، وظیفے یا فیس کے ساتھ تعلیم کے آپشن کا جائزہ لیا جاتا ہے۔ اس کے بعد مطلوبہ دستاویزات تیار کرکے درخواست جمع کرائی جاتی ہے۔ درخواست جمع ہونے کے بعد امیدوار کو اس کی صورتحال پر نظر رکھنا ہوتی ہے، جبکہ منظوری کی صورت میں تعلیمی ویزے سے متعلق ضروری کارروائی مکمل کی جاتی ہے۔

’’سعودی عرب میں تعلیم حاصل کریں‘‘ پلیٹ فارم صرف تعلیمی پروگرام اور داخلے کی معلومات تک محدود نہیں۔ اس پر سعودی عرب میں زندگی سے متعلق بھی مختلف معلومات فراہم کی جاتی ہیں، جن میں مختلف شہر، سرگرمیاں، ثقافت، تاریخ اور قدرتی ماحول سے متعلق معلومات شامل ہیں۔

یوں یہ پلیٹ فارم بین الاقوامی طالب علم کے تعلیمی سفر کے مختلف مراحل کو ایک جگہ جوڑتا ہے، جہاں یونیورسٹی اور شعبے کے انتخاب سے لے کر وظیفے یا فیس کے ساتھ تعلیم، درخواست، داخلے، تعلیمی ویزے اور سعودی عرب میں زندگی سے متعلق ابتدائی معلومات تک رسائی حاصل کی جاسکتی ہے۔