کراچی؛ احسن آباد میں فائر فائٹنگ کے دوران افسوسناک حادثہ، ریسکیو1122 کا اہلکار شہید

کراچی کے علاقے احسن آباد میں گتہ فیکٹری میں آگ لگنے کے باعث فائر فائٹنگ کے دوران افسوسناک حادثہ پیش آیا جس میں ریسکیو1122 کا اہلکار شہید ہو گیا۔

تفصیلات کے مطابق کراچی کے علاقے احسن آباد میں فائر فائٹنگ کے دوران افسوسناک حادثہ پیش آیا جس میں ریسکیو 1122 کا اہلکار بلال تنولی ریسکیو آپریشن کے دوران شہید ہوگیا۔

بلال تنولی ریسکیو 1122 کی تاریخ کا پہلا شہید بن گیا، 24 سالہ بلال تنولی سیٹلائیٹ اسٹیشن ایم نائن میں تعینات تھا۔ شہید کارکن آج چھٹی پر تھا۔

بلال تنولی کی رہائش احسن آباد میں آگ کے مقام کے قریب تھی، ایمرجنسی صورتحال دیکھ کر ریسکیو عمل میں حصہ لینے پہنچا تھا۔

بلال تنولی کو لوہے کی راڈ لگی جس سے وہ شدید زخمی ہو گیا تھا، بلال اسپتال میں دوران علاج دم توڑ گیا۔

دوسری جانب گتہ فیکٹری میں آگ تاحال بے قابو ہے، کولنگ کے دوران نوجوان بلال تنولی شہید ہوا۔ فائر بریگیڈ حکام کی جانب سے متاثرہ فیکٹری کی عمارت کو مخدوش قرار دینے کا فیصلہ کر لیا گیا۔