وفاقی وزیر برائے قومی صحت سید مصطفیٰ کمال نے کہا ہے کہ صحت ہماری قومی ترجیح ہے اور پولیو کا خاتمہ ہماری اخلاقی ذمہ داری ہے۔ ہمیں اپنی حالیہ کامیابیوں کو مزید مضبوط کرنا ہوگا، خاص طور پر اُن علاقوں میں بھرپور توجہ دینی ہوگی جہاں وائرس خاموشی سے پھیل رہا ہے۔
وفاقی وزیر برائے قومی صحت سید مصطفیٰ کمال کی زیر صدارت صوبائی وزرائے صحت اعلیٰ سطحی اجلاس جس کا مقصد پاکستان میں پولیو کے خاتمے کے حوالے سے حالیہ پیشرفت کا جائزہ لینا اور آئندہ قومی پولیو مہم کے لیے جامع حکمتِ عملی مرتب کرنا ہے۔
وفاقی وزیر کی جانب سے عہدہ سنبھالنے کے بعد بین الصوبائی سطح پر پہلا باضابطہ اجلاس تھا، وفاقی وزیر صحت نے فرنٹ لائن ورکرز اور سیکیورٹی اہلکاروں کی خدمات کو خراجِ تحسین پیش کرتے ہوئے کہا یہ پروگرام مربوط عوامی صحت کا ایک مثالی ماڈل بن چکا ہے، جس میں ای پی آئی اور انسداد پولیو پروگرام کی ہم آہنگی نے نمایاں کردار ادا کیا ہے۔
انہوں نے مزید کہا کہ کراچی، کوئٹہ بلاک اور جنوبی خیبرپختونخوا میں وائرس کی موجودگی انتہائی تشویشناک ہے اور آئندہ مہم کا مقصد ان علاقوں تک رسائی حاصل کرنا اور رہ جانے والے بچوں کو ویکسین فراہم کرنا ہونا چاہیے۔
آئندہ قومی انسداد پولیو مہم کا آغاز 21 اپریل سے ہوگا، جس میں پانچ سال سے کم عمر کے 4 کروڑ 50 لاکھ بچوں کو پولیو سے بچاؤ کے قطرے پلانا کا حدف رکھا گیا ہے ۔
اس مہم میں 4 لاکھ فرنٹ لائن ورکرز شریک ہوں گے، جن میں 2 لاکھ 25 ہزار خواتین بھی شامل ہیں، وزیراعظم کی فوکل پرسن برائے انسداد پولیو عائشہ رضا فاروق نے کہا ہم ایک فیصلہ کن مرحلے میں داخل ہو چکے ہیں۔
کیسز کی تعداد میں نمایاں کمی ہماری حکمتِ عملی اور ٹیموں کی مسلسل محنت کا نتیجہ ہے۔اجلاس میں صوبائی وزرائے صحت نے انسداد پولیو کے لیے اپنے بھرپور تعاون کا یقین دلایا ہے۔