نادرا میں 2 اہم آسامیوں کا اعلان، آئی ٹی ماہرین کے لیے بڑا موقع
پاکستان میں ڈیجیٹل نظام کو مزید جدید، محفوظ اور مؤثر بنانے کے لیے قومی ادارہ برائے ڈیٹابیس و رجسٹریشن (نادرا) نے ٹیکنالوجی کے شعبے سے وابستہ تجربہ کار اور اعلیٰ مہارت رکھنے والے افراد کے لیے ڈائریکٹر کی دو اہم آسامیوں کا اعلان کیا ہے۔
ان عہدوں کے لیے ایسے پیشہ ور افراد درکار ہیں جو بڑے پیمانے پر سافٹ ویئر کی تیاری، جدید ٹیکنالوجی کے نظام، سائبر سیکیورٹی اور ڈیجیٹل منصوبوں کی نگرانی کا تجربہ رکھتے ہوں۔
نادرا کی جانب سے جاری کردہ اعلان کے مطابق ادارے کو ڈائریکٹر (سافٹ ویئر ڈیولپمنٹ) اور ڈائریکٹر (آرکیٹیکچر ڈیزائن اینڈ کمپلائنس) کی ضرورت ہے۔ دونوں عہدوں کی تعیناتی اسلام آباد میں نادرا ہیڈکوارٹرز کے لیے کی جائے گی۔ ان تقرریوں کا مقصد ادارے کے بڑے ڈیجیٹل نظاموں کی تیاری، ان کے باہمی رابطے، تکنیکی معیار اور سیکیورٹی کو بہتر بنانے کے لیے تجربہ کار قیادت حاصل کرنا ہے۔
ڈائریکٹر سافٹ ویئر ڈیولپمنٹ کی ذمہ داریاں
ڈائریکٹر سافٹ ویئر ڈیولپمنٹ کا بنیادی کام نادرا کے بڑے پیمانے پر استعمال ہونے والے سافٹ ویئر اور ڈیجیٹل نظاموں کی تیاری اور ان کی کارکردگی کی نگرانی کرنا ہوگا۔ اس عہدے پر تعینات ہونے والا افسر سافٹ ویئر انجینئرنگ کی ٹیموں کی قیادت کرے گا اور اس بات کو یقینی بنائے گا کہ نئے سافٹ ویئر اور ڈیجیٹل سہولیات محفوظ، تیز رفتار اور قابلِ اعتماد ہوں۔
اس کے علاوہ امیدوار کو سافٹ ویئر کی تیاری کے مختلف مراحل، ایگیل ، سیڈی ایل سی، اسکرم اور ڈیواپس جیسے جدید طریقہ کار کا تجربہ ہونا چاہیے۔ ان طریقوں کے ذریعے سافٹ ویئر کی تیاری، جانچ اور بہتری کے عمل کو زیادہ منظم اور تیز بنایا جاتا ہے۔
نادرا کو ایسے امیدوار بھی درکار ہیں جو مائیکرو سروسز، اے پی آئی، کلاؤڈ ٹیکنالوجی، ڈیٹا بیس، سائبر سیکیورٹی اور مختلف ڈیجیٹل نظاموں کو آپس میں منسلک کرنے کی مہارت رکھتے ہوں۔ سافٹ ویئر میں موجود سیکیورٹی کی خامیوں کی نشاندہی اور انہیں دور کرنے کے لیے او ڈبلیو اے ایس پی اور وی اے پی ٹی جیسے سیکیورٹی طریقہ کار سے واقفیت بھی ضروری سمجھی گئی ہے۔
آرکیٹیکچر ڈیزائن اینڈ کمپلائنس کے ڈائریکٹر کا کردار
دوسری آسامی ڈائریکٹر (آرکیٹیکچر ڈیزائن اینڈ کمپلائنس) کی ہے، جس کے لیے ایسے ماہرین درکار ہیں جو کسی بڑے ادارے کے ٹیکنالوجی نظام کا مجموعی ڈھانچہ تیار کرنے، اس کے معیار کا جائزہ لینے اور سیکیورٹی کے تقاضوں پر عمل درآمد یقینی بنانے کا تجربہ رکھتے ہوں۔
اس عہدے پر کام کرنے والے ڈائریکٹر کی ذمہ داری ہوگی کہ نادرا کے مختلف سافٹ ویئر اور ڈیجیٹل نظام ایک دوسرے کے ساتھ درست طریقے سے کام کریں اور ان کی تیاری میں طے شدہ تکنیکی اور سیکیورٹی معیارات کو مدنظر رکھا جائے۔ اس میں نظاموں کے ڈیزائن کی جانچ، تکنیکی جائزہ، کارکردگی کی تصدیق اور ممکنہ خطرات کی نشاندہی بھی شامل ہوگی۔
اس عہدے کی ایک اہم ذمہ داری اے آئی سے متعلق جدید ٹیکنالوجیز کا جائزہ لینا بھی ہے۔ اشتہار کے مطابق امیدوار کو مشین لرننگ، نیچرل لینگویج پروسیسنگ اور جنریٹو اے آئی سمیت بڑے لینگویج ماڈلز (ایل ایل ایم) کے فریم ورکس کو سمجھنے اور ان کے ممکنہ استعمال کا جائزہ لینے کی صلاحیت ہونی چاہیے۔
خصوصاً ایسے مصنوعی ذہانت کے نظاموں کا جائزہ لینے کا تجربہ اہم ہوگا جنہیں ادارے کے اپنے سرورز اور اندرونی ڈیجیٹل انفرااسٹرکچر پر نصب کرکے چلایا جا سکے۔ اس طریقے سے ادارے کو اپنے ڈیٹا اور ٹیکنالوجی کے نظام پر زیادہ کنٹرول حاصل رہتا ہے۔
تعلیم اور تجربے کی شرائط
نادرا کے اشتہار کے مطابق دونوں آسامیوں کے لیے کمپیوٹر سائنس، سافٹ ویئر انجینئرنگ، کمپیوٹر انجینئرنگ یا کسی متعلقہ شعبے میں چار سالہ بیچلر ڈگری رکھنے والے امیدوار درخواست دے سکتے ہیں۔ ڈگری ہائر ایجوکیشن کمیشن (ایچ ای سی) سے تسلیم شدہ یونیورسٹی کی ہونی چاہیے، جبکہ ماسٹرز ڈگری رکھنے والے امیدواروں کو ترجیح دی جائے گی۔
امیدواروں کے لیے متعلقہ شعبے میں کم از کم 10 سال کا پیشہ ورانہ تجربہ لازمی قرار دیا گیا ہے، تاہم 15 سال کا تجربہ رکھنے والوں کو ترجیح دی جائے گی۔ اس کے ساتھ کم از کم پانچ سال کسی سینئر تکنیکی قیادت کے عہدے پر کام کرنے کا تجربہ بھی درکار ہے۔
نادرا نے ایسے امیدواروں کو ترجیح دینے کا عندیہ دیا ہے جنہوں نے بڑے اداروں، سرکاری منصوبوں یا بین الاقوامی سطح کے ٹیکنالوجی منصوبوں پر کام کیا ہو۔ دونوں عہدوں کے لیے زیادہ سے زیادہ عمر کی حد 55 سال مقرر کی گئی ہے، جس میں پانچ سال کی عمومی عمر کی رعایت پہلے ہی شامل ہے۔
درخواست دینے کا طریقہ اور آخری تاریخ
نادرا کے مطابق دونوں آسامیوں کے لیے درخواستیں صرف آن لائن وصول کی جائیں گی۔ دلچسپی رکھنے والے اور مطلوبہ تعلیمی و پیشہ ورانہ قابلیت کے حامل امیدوار ادارے کے سرکاری کیریئر پورٹل پر جا کر درخواست جمع کرا سکتے ہیں۔
درخواست دینے کی آخری تاریخ 22 نومبر 2026 مقرر کی گئی ہے۔ امیدوار درخواست جمع کرانے سے پہلے پورٹل کے ڈاؤن لوڈز سیکشن میں موجود درخواست دینے سے متعلق رہنما ہدایات کا مطالعہ بھی کر سکتے ہیں۔
سرکاری اور نیم سرکاری اداروں میں کام کرنے والے امیدواروں کے لیے انٹرویو کے وقت متعلقہ محکمے کا این او سی پیش کرنا ضروری ہوگا۔ صرف شارٹ لسٹ ہونے والے امیدواروں کو ٹیسٹ یا انٹرویو کے لیے بلایا جائے گا، جبکہ منتخب امیدواروں کو ملازمت شروع کرنے کے وقت متعلقہ تعلیمی دستاویزات کی تصدیق شدہ نقول، میڈیکل فٹنس اور کریکٹر سرٹیفکیٹ بھی فراہم کرنا ہوں گے۔
اشتہار میں مزید بتایا گیا ہے کہ منتخب امیدواروں کو ابتدائی طور پر چھ ماہ کی آزمائشی مدت سے گزرنا ہوگا، جس میں کارکردگی کی بنیاد پر توسیع بھی کی جا سکتی ہے۔ نادرا نے خواتین، اقلیتوں، خواجہ سراؤں اور خصوصی افراد کو بھی درخواست دینے کی حوصلہ افزائی کی ہے۔
مزید تفصیلات اور درخواست جمع کرانے کے لیے نادرا کے سرکاری پورٹل پر وزٹ کریں۔