کراچی کے ڈسٹرکٹ سٹی میں جعلی پولیس اہلکاروں نے ایک بار پھر قانون کی دھجیاں اڑا دیں۔ سفید رنگ کی ایک کار میں سوار تین ملزمان نے چھ شہریوں کو لوٹ کر لاکھوں روپے کا نقصان پہنچایا۔ واردات کی ویڈیو اور سی سی ٹی وی فوٹیج بھی سامنے آ گئی ہے جس میں سفید گاڑی کو متاثرہ شہری کا تعاقب کرتے دیکھا جا سکتا ہے۔
واردات میں شامل ایک ملزم پولیس کی وردی میں ملبوس تھا جب کہ دو دیگر ملزمان نے شلوار قمیض پہن رکھی تھی۔ تینوں نے تلاشی کا بہانہ بنا کر شہریوں کی گاڑی کو روکا اور اسلحہ نکال کر انہیں خوفزدہ کر دیا۔
ملزمان نے متاثرہ شہریوں سے زبردستی 200 امریکی ڈالر، قیمتی انگوٹھیاں، موبائل فونز، 52 ہزار روپے نقد، اور چھ عدد پاسپورٹ چھین لیے۔ واردات نہایت منظم طریقے سے کی گئی اور ملزمان کارروائی مکمل کرنے کے بعد سفید کار میں فرار ہو گئے۔
متاثرہ شہری نے فوری طور پر رسالہ تھانے میں ابتدائی درخواست جمع کرا دی ہے۔ پولیس حکام نے واقعے کی تصدیق کرتے ہوئے بتایا کہ سی سی ٹی وی فوٹیج حاصل کر لی گئی ہے اور ملزمان کی گرفتاری کے لیے تفتیش شروع کر دی گئی ہے۔
شہریوں نے واردات کے بعد قانون نافذ کرنے والے اداروں سے مطالبہ کیا ہے کہ ایسے جعلی پولیس اہلکاروں کے خلاف سخت کارروائی کی جائے اور ان وارداتوں کو روکنے کے لیے مؤثر اقدامات کیے جائیں۔
یاد رہے کہ کراچی میں اس نوعیت کی وارداتیں پہلے بھی ہو چکی ہیں، جہاں جعلی وردی اور جعلی پولیس گاڑیوں کا استعمال کر کے شہریوں کو لوٹا جاتا ہے۔ پولیس کا کہنا ہے کہ جلد ہی ملزمان کو گرفتار کر کے قانون کے کٹہرے میں لایا جائے گا۔