کوئی شک نہیں پاکستان میں دہشتگردی میں بھارتی خفیہ ایجنسی ’را‘ کا ہاتھ ہے، رانا ثنااللہ

وزیر اعظم کے مشیر رانا ثنااللہ نے کہا ہے کہ دہشت گرد مجرم ہیں جو کسی رعایت کے مستحق نہیں، دہشت گردوں نے مسافروں کو شہید کیا ہے، کوئی شک نہیں پاکستان میں دہشت گردی میں بھارتی خفیہ ایجنسی ’را‘ کا ہاتھ ہے، را دہشت گردوں کی ماں کا کردار ادا کررہی ہے، را سفاکانہ کارروائیوں کے لیے فنڈز اور اسلحہ فراہم کررہی ہے جبکہ افغان حکومت پاکستان میں دہشت گردی کے لیے پراکسی کا کردار ادا کررہی ہے، افغانستان میں دہشت گردوں کی تیاری ہوتی ہے اورپھر پاکستان میں کارروائی کرتے ہیں۔

فیصل آباد میں میڈیا سے گفتگو کرتے ہوئے مشیر وزیراعظم رانا ثنا اللہ نے دہشت گردی کے حالیہ واقعات پر سخت ردعمل دیتے ہوئے کہا کہ دہشت گرد مجرم ہیں اور معصوم مسافروں کو شہید کیا ہے، ایسے عناصر کسی رعایت کے مستحق نہیں۔

سابق وزیر داخلہ نے کہا کہ دہشت گردی کے خاتمے کے لیے پوری دنیا متفق ہے اور پاکستان اس جنگ میں صف اول کا کردار ادا کر رہا ہے۔

رانا ثنا اللہ نے ایک سیاسی جماعت کے سوشل میڈیا ونگ پر الزام عائد کرتے ہوئے کہا کہ وہ پروپیگنڈا کر رہے ہیں، جو بھارتی میڈیا کرتا تھا، وہی یہ لوگ کر رہے ہیں۔ انہوں نے افغانستان کی حکومت پر الزام لگایا کہ وہ پراکسی کا کردار ادا کر رہی ہے اور بیرونی عناصر ملک میں عدم استحکام پیدا کرنا چاہتے ہیں۔

وزیراعظم کے مشیر نے کہا کہ بھارتی ایجنسی ’را‘ پاکستان میں دہشت گردی کی کارروائیوں میں ملوث ہے اور دہشت گردوں کی ماں کا کردار ادا کر رہی ہے، ’را‘ دہشت گردوں کو اسلحہ اور فنڈز فراہم کر رہی ہے تاکہ پاکستان میں انتشار پیدا کیا جا سکے۔

انہوں نے مزید کہا کہ پاکستان نے افغان پناہ گزینوں کی سالہا سال مدد کی، لیکن افغانستان کی حکومت نے دہشت گردوں کو سہولتیں فراہم کر رکھی ہیں۔ افغانستان میں دہشت گردوں کی تربیت ہوتی ہے اور پھر وہ پاکستان میں کارروائیاں کرتے ہیں۔

رانا ثنا اللہ کا کہنا تھا کہ جیسے ہی دہشت گرد کارروائی کرتے ہیں، بھارتی میڈیا فوری طور پر پروپیگنڈا شروع کر دیتا ہے۔ ایسا لگتا ہے کہ بھارتی میڈیا کو پہلے سے اطلاع ہوتی ہے۔

سابق وزیر داخلہ نے پاک افواج کی کارروائی کی تعریف کرتے ہوئے کہا کہ ہماری افواج نے بروقت آپریشن کرتے ہوئے جعفر ایکسپریس واقعے میں ملوث دہشت گردوں کو جہنم واصل کیا اور ٹرین میں سفر کرنے والے تمام مسافروں کو بحفاظت بازیاب کروایا۔

وزیراعظم کے مشیر نے مزید کہا کہ کسی گرینڈ آپریشن کی ضرورت نہیں ہے، انٹیلی جنس بیسڈ آپریشن جاری ہیں اور ہم دہشت گردوں کو ان کے انجام تک پہنچائیں گے۔