امریکی وزیرخارجہ کااسحاق ڈارسے رابطہ، علاقائی سلامتی اورمعاشی تعاون پرگفتگو، مارکوروبیو نے دہشت گردی کےخلاف جنگ میں پاکستانی کاوشوں کو سراہا۔ افغانستان میں امریکی اسلحے کا معاملہ حل کرنے پر اتفاق۔
ترجمان دفتر خارجہ کے مطابق دونوں رہنماؤں کے درمیان دو طرفہ تعلقات، علاقائی سلامتی اور معاشی تعاون پر تبادلہ خیال کیا گیا۔
اس موقع پر وزیر خارجہ اسحاق ڈار نے کہاکہ پاکستان امریکا کے ساتھ اپنی شراکت داری کو مزید مستحکم کرنے کے لیے پُرعزم ہے۔
ترجمان کے مطابق اسحاق ڈار نے امریکا کے ساتھ تجارت، سرمایہ کاری اور انسداد دہشتگردی کے شعبوں میں تعاون کی اہمیت پر زور دیا۔
امریکی وزیر خارجہ نے پاکستان کے معدنیات سمیت ساتھ تجارت اور سرمایہ کاری کے شعبوں میں تعاون کیلیے دلچسپی کا اظہار کیا اور کہا کہ پاکستان اور امریکہ کے درمیان معاشی تعاون مستقبل کے تعلقات کیلیے اہم ہے۔
اسحاق ڈار نے دوہزار تیرا سے دوہزار اٹھارہ کے درمیان دہشت گردی کے خلاف کامیاب جنگ کا بھی ذکر کیا جس میں پاکستان نے بڑاجانی اور مالی نقصان برداشت کیا۔ جس پر امریکی وزیر خارجہ نے دہشت گردی کے خلاف جنگ میں پاکستان کی کاوشوں کو سراہتے ہوئے انسداد دہشت گردی کیلیے مستقبل کے تعاون کیلیے امریکہ کی جانب سے دلچسپی کا بھی اظہار کیا۔
دونوں رہنماؤں کے درمیان افغانستان میں امریکی فوجی سامان کا معاملہ حل کرنے پر بھی اتفاق ہوا۔۔امریکی وزیر خارجہ مارکو روبیو نے نائب وزیراعظم اور وزیر خارجہ محمد اسحاق ڈار مشترکہ مفادات کیلیے قریبی رابطے میں رہنے پر بھی اتفاق کیا