لاہور: شیرنی کے حملے سے نوجوان جاں بحق، فارم ہاؤس کا مالک اور ٹک ٹاکر گرفتار
لاہور کے علاقے کاہنہ میں ٹک ٹاک ویڈیو بنانے کے دوران ایک افسوسناک واقعہ پیش آیا، جہاں فارم ہاؤس میں موجود شیرنی نے حملہ کرکے 19 سالہ نوجوان ملازم کی جان لے لی۔ واقعے کے بعد پولیس نے فارم ہاؤس کے مالک فیاض عرف فیضی اور ویڈیو بنانے کے لیے وہاں پہنچنے والے ٹک ٹاکر نعمان کو گرفتار کرلیا، جبکہ شیرنی کو محکمہ وائلڈ لائف کے حوالے کردیا گیا۔
پولیس حکام کے مطابق یہ واقعہ اس وقت پیش آیا جب ٹک ٹاکر نعمان ویڈیو بنانے کے لیے کاہنہ میں واقع فارم ہاؤس پہنچا۔ اسی دوران وہاں موجود شیرنی اچانک قابو سے باہر ہوگئی اور اس نے فارم ہاؤس میں کام کرنے والے 19 سالہ طلحہ پر حملہ کردیا۔
شیرنی کے حملے میں طلحہ شدید زخمی ہوگیا، جسے فوری طور پر طبی امداد کے لیے ایک نجی اسپتال منتقل کیا گیا، تاہم وہ زخموں کی تاب نہ لاتے ہوئے دم توڑ گیا۔
واقعے کے بعد معاملے نے اس وقت مزید سنگین صورت اختیار کرلی جب تحقیقات میں اسے چھپانے کی کوشش کا انکشاف ہوا۔ پولیس کے مطابق نوجوان کی ہلاکت کے اصل واقعے پر پردہ ڈالنے کے لیے شیرنی کے حملے کو کتے کا حملہ ظاہر کرنے کی کوشش کی گئی تھی۔
تاہم پولیس نے واقعے کے مختلف پہلوؤں کا جائزہ لیا تو حقیقت سامنے آگئی کہ طلحہ کی موت کتے کے بجائے شیرنی کے حملے کے نتیجے میں ہوئی تھی۔
پولیس نے کارروائی کرتے ہوئے فارم ہاؤس کے مالک فیاض عرف فیضی اور ٹک ٹاکر نعمان کو گرفتار کرلیا ہے۔ دوسری جانب حملہ کرنے والی شیرنی کو محکمہ وائلڈ لائف کی تحویل میں دے دیا گیا ہے تاکہ اسے متعلقہ حکام کی نگرانی میں رکھا جاسکے۔
پولیس نے جاں بحق نوجوان طلحہ کی لاش کو پوسٹ مارٹم کے لیے مردہ خانے منتقل کردیا ہے، جبکہ واقعے کا مقدمہ درج کرنے کا عمل بھی جاری ہے۔
حکام کے مطابق تحقیقات میں یہ معلوم کیا جا رہا ہے کہ فارم ہاؤس میں شیرنی رکھنے کے لیے باقاعدہ اجازت نامہ موجود تھا یا نہیں اور وہاں جانور کی حفاظت کے ساتھ ساتھ لوگوں کی جان و مال کے تحفظ کے لیے مناسب انتظامات کیے گئے تھے یا نہیں۔
اس کے علاوہ پولیس فارم ہاؤس انتظامیہ کی ممکنہ غفلت، ٹک ٹاک ویڈیو بنانے کے دوران اختیار کیے گئے حفاظتی اقدامات اور واقعے کی حقیقت چھپانے کی مبینہ کوشش کا بھی جائزہ لے رہی ہے۔
پولیس حکام کا کہنا ہے کہ واقعے کے تمام پہلوؤں کی تحقیقات کی جا رہی ہیں اور ذمہ دار پائے جانے والے افراد کے خلاف قانون کے مطابق سخت کارروائی عمل میں لائی جائے گی۔