راولپنڈی ٹیسٹ: سری لنکا کے خلاف ٹیسٹ ڈیبیو پر پاکستانی فاسٹ بولر نے دھوم مچادی

پاکستان اور سری لنکا کے درمیان راولپنڈی ٹیسٹ کے چوتھے روز پاکستانی فاسٹ بولر ثاقب خان نے شاندار بولنگ کرتے ہوئے سری لنکا کی پہلی اننگز 446 رنز پر سمیٹنے میں اہم کردار ادا کیا اور پاکستان کی جانب سے پہلے ہی ٹیسٹ میں 7 وکٹیں لینے کا ریکارڈ برابر کردیا جب کہ ثاقب خان ڈیبیو پر 5 یا اس سے زائد وکٹیں لینے والے پاکستان کے سولہویں بولر بن گئے۔

راولپنڈی کرکٹ اسٹیڈیم میں کھیلے جارہے پہلے ٹیسٹ کے چوتھے روز سری لنکا نے اپنی پہلی اننگز 4 وکٹوں کے نقصان پر 404 رنز سے دوبارہ شروع کی تو پاکستانی بولرز نے مہمان ٹیم کو مزید 42 رنز بنانے دیے اور اس کی آخری 6 وکٹیں حاصل کرلیں۔

ثاقب خان نے 130 رنز دے کر 7 کھلاڑیوں کو آؤٹ کیا جب کہ محمد عباس نے 2 وکٹیں حاصل کیں۔ سری لنکا کی جانب سے دھننجایا ڈی سلوا 167 رنز بناکر نمایاں رہے جب کہ کپتان کوشل مینڈس نے 119 رنز کی اننگز کھیلی۔ دونوں بلے بازوں کے درمیان 249 رنز کی شراکت قائم ہوئی۔

ثاقب خان نے چوتھے روز کھیل کے آغاز پر ہی دھننجایا ڈی سلوا کو آؤٹ کرکے اس شراکت کا خاتمہ کیا، جس کے بعد کوشل مینڈس بھی 119 رنز بناکر پویلین لوٹ گئے۔ فاسٹ بولر نے اپنے پہلے 8 اوورز میں 5 وکٹیں حاصل کیں۔

اس کے علاوہ سونل دینوشا 20 رنز بناکر ثاقب خان کا شکار بنے جب کہ ملان رتھنائیکے اور دیگر کھلاڑی بھی پاکستانی بولرز کے سامنے زیادہ دیر مزاحمت نہ کرسکے۔

ثاقب خان ٹیسٹ ڈیبیو پر ایک اننگز میں 7 وکٹیں لینے والے چوتھے پاکستانی بولر بن گئے۔ ان سے پہلے محمد نذیر، محمد زاہد اور ابرار احمد بھی یہ کارنامہ انجام دے چکے ہیں جب کہ ڈیبیو میچ میں 5 یا اس سے زائد وکٹیں لینے والے وہ 16ویں پاکستانی بولر ہیں جب کہ وہ یہ کارنامہ انجام دینے پر خدا کے حضور سجدہ ریز بھی ہوئے۔

سری لنکا کے 446 رنز پر آؤٹ ہونے کے بعد اسے پاکستان کی پہلی اننگز کے 434 رنز کے مقابلے میں 12 رنز کی برتری حاصل ہوئی۔

پاکستان نے دوسری اننگز شروع کی تو ڈیبیو کرنے والے طیب عارف 11 رنز بناکر آؤٹ ہوگئے تاہم اذان اویس اور محمد طحہ نے محتاط بیٹنگ کرتے ہوئے مزید کوئی وکٹ نہ گرنے دی۔

چوتھے روز کھیل ختم ہونے پر پاکستان نے 21.2 اوورز میں ایک وکٹ کے نقصان پر 57 رنز بنالیے تھے۔ اذان اویس 22 جب کہ محمد طحہ 24 رنز بناکر کریز پر موجود تھے۔ اس طرح پاکستان کو سری لنکا پر مجموعی طور پر 45 رنز کی برتری حاصل ہوگئی۔

چوتھے روز خراب موسم کے باعث مجموعی طور پر صرف 36.4 اوورز کا کھیل ممکن ہوسکا۔ پہلے خراب روشنی کے باعث کھیل روکا گیا، جس کے بعد بارش کے باعث مزید کھیل نہ ہوسکا۔

یوں راولپنڈی ٹیسٹ کا چوتھا روز ثاقب خان کی شاندار بولنگ کے نام رہا، تاہم محدود کھیل اور خراب موسم کے باعث میچ ڈرا کی جانب گامزن ہے۔