مسلم لیگ ( ن ) کے قائد نواز شریف نے کہا ہے کہ پاکستان درست سمت میں چل پڑا ہے، سب کو مل کر پاکستان کی ترقی کے لیے کردار ادا کرنا ہوگا۔
لندن میں میڈیا سے گفتگو کرتے ہوئے سابق وزیر اعظم نواز شریف نے وزیرِ اعظم شہباز شریف کی کارکردگی کو سراہتے ہوئے کہا کہ پاکستان درست سمت میں چل پڑا ہے، وزیراعظم شہباز شریف بہترین کام کر رہے ہیں اور انہوں نے گرتی ہوئی معیشت کو سنبھال کر دوبارہ پاؤں پر کھڑا کیا۔
مسلم لیگ ن کے قائد نواز شریف نے مزید کہا کہ سب کو مل کر پاکستان کی ترقی کے لیے کردار ادا کرنا ہوگا۔
نواز شریف نے اپنی صحت سے متعلق زیر گردش خبروں کی تردید کرتے ہوئے کہا کہ میری صحت بالکل ٹھیک ہے اور میری صحت سے متعلق غلط خبر پھیلائی گئی۔
ان کا مزید کہنا تھا کہ مریم نواز نے پنجاب میں ترقی کی نئی منازل طے کی ہیں اہو پنجاب میں کوئی بھی کام میرٹ کے خلاف نہیں کر رہے، لاہور کی بحالی کے لیے بہت سے منصوبے چل رہے ہیں اور لاہور کو اصلی حالت میں بحال کریں گے۔
سابق وزیراعظم نواز شریف اس وقت لندن میں موجود ہیں اور سیاسی معاملات پر قریبی مشاورت کا عمل جاری رکھے ہوئے ہیں۔