مودی سرکار کی جانب سے رچایا گیا پہلگام حملے کا ڈرامہ بری طرح بے نقاب ہو گیا۔ سیکیورٹی ذرائع کے مطابق بھارتی حکومت نے اس واقعے کو بنیاد بنا کر جو مبینہ دہشت گردوں کے خاکے جاری کیے، وہ درحقیقت مصنوعی ذہانت (AI) سے بنائے گئے ہیں۔
ماہرین کے مطابق ان خاکوں میں انسانی ہاتھ کا کوئی عمل دخل نہیں بلکہ یہ سب ایک مخصوص الگورتھم کے تحت تیار کیے گئے فرضی چہرے ہیں جنہیں صرف چند منٹوں میں بنایا جا سکتا ہے۔ ان خاکوں میں تمام چہروں کا انداز، تناسب، اور ساخت ایک جیسی ہے جو AI کی تخلیق کا منہ بولتا ثبوت ہے۔
ذرائع کا کہنا ہے کہ بھارت نے پہلگام حملے کے نام پر ایک جھوٹا بیانیہ گھڑا اور اس پر مبنی فلمی کہانی کو سچ کا رنگ دینے کے لیے AI سے تیار کردہ سکیچز جاری کیے تاکہ عالمی رائے عامہ کو گمراہ کیا جا سکے۔ تاہم ثبوتوں کے فقدان اور ناقص پروپیگنڈے نے اس سازش کو زمین بوس کر دیا۔
حکومتی حلقوں نے اس جعلی کارروائی کو بھارت کی مکارانہ چال قرار دیتے ہوئے کہا ہے کہ دنیا کو اس ڈرامے سے آگاہ کیا جائے گا اور مودی سرکار کی طرف سے پھیلائے گئے اس فریب کو بے نقاب کیا جائے گا۔
پاکستانی تجزیہ کاروں اور سوشل میڈیا صارفین نے بھی اس سازش پر شدید ردعمل دیتے ہوئے کہا ہے کہ بھارت کے جھوٹ کا پول کھل چکا ہے، اب نہ کوئی اس کہانی پر یقین کرے گا اور نہ ہی بھارت کی ساکھ بچے گی۔