لاہور میں بھی پنکی طرز کے منشیات فروش نیٹ ورک کا انکشاف
لاہور شہر میں بھی ’پنکی‘ طرز کے منشیات فروش نیٹ ورک کا انکشاف ہوا ہے، جہاں اسلام آباد سے لاہور کے مختلف علاقوں میں ویڈ اور آئس سپلائی کیے جانے کا دعویٰ سامنے آیا ہے۔
پولیس ذرائع کے مطابق مرکزی منشیات سپلائر کی شناخت احمد عرف پیر لالہ خان کے نام سے ہوئی ہے، تاہم اسلام آباد اور لاہور پولیس کے درمیان رابطے کے فقدان کے باعث مرکزی ملزم تاحال گرفتار نہیں ہوسکا۔
پولیس ذرائع کے مطابق لاہور میں منشیات فروشوں نے نہ صرف مختلف علاقوں بلکہ شہروں کی سطح پر بھی اپنے نیٹ ورک تقسیم کر رکھے ہیں۔ اسی سلسلے میں لاہور میں ایک بڑے منشیات فروشی کے نیٹ ورک کا انکشاف ہوا ہے۔
ذرائع کا کہنا ہے کہ جس طرح مبینہ طور پر پنکی لاہور میں بیٹھ کر کراچی کو منشیات سپلائی کرتی تھی، اسی طرز پر احمد عرف پیر لالہ خان لاہور میں منشیات کی سپلائی کا نیٹ ورک چلا رہا ہے۔
پولیس ذرائع کے مطابق ویڈ اور آئس کا مبینہ مرکزی ڈیلر اسلام آباد کے علاقے ای الیون کا رہائشی ہے اور اسلام آباد سے لاہور منشیات سپلائی کی جا رہی ہے۔
پولیس ریکارڈ میں مرکزی منشیات سپلائر کا نام احمد عرف پیر لالہ خان درج ہے۔ ذرائع کے مطابق ملزم صرف لاہور میں منشیات سپلائی کرتا ہے اور شہر میں اس کا مضبوط نیٹ ورک موجود ہے۔
ذرائع کا کہنا ہے کہ ملزم کا نیٹ ورک لاہور کے ماڈل ٹاؤن اور کینٹ ڈویژن میں زیادہ فعال ہے، جبکہ ڈیفنس، گلبرگ اور گارڈن ٹاؤن سمیت پوش علاقوں میں ویڈ اور آئس کی سپلائی کیے جانے کا انکشاف ہوا ہے۔
پولیس ذرائع کے مطابق مختلف مقدمات میں منشیات فروشوں سے ویڈ اور آئس ڈیلر کے نام سے متعلق معلومات بھی سامنے آئی ہیں۔
ذرائع کا کہنا ہے کہ اسلام آباد اور لاہور پولیس کے درمیان رابطے کے فقدان کے باعث مرکزی ملزم تاحال گرفتار نہیں ہوسکا۔
دوسری جانب سی سی ڈی اور انویسٹی گیشن ونگ بھی مرکزی ڈرگ ڈیلر کو گرفتار کرنے میں تاحال کامیاب نہیں ہوسکے۔ پولیس کی جانب سے نیٹ ورک اور مرکزی ملزم سے متعلق مزید تحقیقات جاری ہیں۔