وزیراعظم شہبازشریف کا کہنا ہے کہ پاکستان میں مختلف شعبوں میں سرمایہ کاری کے پرکشش مواقع موجود ہیں، پاکستان بین الاقوامی سطح پر تیزی سے کرپٹوکرنسی کو اپنانے والی معیشتوں میں سے ایک ہے جبکہ باصلاحیت نوجوان ملک میں کرپٹوکرنسی کے فروغ میں اہم کردار ادا کر سکتے ہیں۔
وزیراعظم شہباز شریف سے عالمی فائنانس کمپنی ورلڈ لبرٹی فنانشل کے شریک چیئرمین زیک ویٹکوف کی سربراہی میں وفد نے ملاقات کی ہے۔
ملاقات کے دوران وفد نے پاکستان میں کرپٹوکرنسی کے شعبے کی ترویج کے لیے سرمایہ کاری میں دلچسپی کا اظہار کیا۔
ملاقات میں آرمی چیف جنرل عاصم منیر، نائب وزیراعظم ووزیر خارجہ اسحاق ڈار، وزیر دفاع خواجہ آصف، وزیراطلاعات عطا تارڑ، وفاقی وزیر احد چیمہ اور متعلقہ اعلیٰ افسران شریک تھے۔
اس موقع پر وزیر اعظم نے کہا کہ پاکستان میں مختلف شعبوں میں سرمایہ کاری کے پرکشش مواقع موجود ہیں، پاکستان بین الاقوامی سطح پر تیزی سے کرپٹوکرنسی کو اپنانے والی معیشتوں میں سے ایک ہے۔
ان کا کہنا تھا کہ پاکستان کے باصلاحیت نوجوان ملک میں کرپٹوکرنسی کے فروغ میں اہم کردار ادا کر سکتے ہیں جب کہ ملک میں کرپٹوکرنسی جیسے معاشی لین دین کے متبادل طریقوں کی ترویج کے لیے قوائد و ضوابط کی تشکیل پر کام تیزی سے جاری ہے۔
ورلڈ لبرٹی فنانشل کے شریک چیئرمین زیک ویٹکوف نے کہا کہ پاکستان میں قدرتی وسائل میں کے حوالے سے عالمی سرمایہ کاروں کے لیے انتہائی پرکشش مواقع موجود ہیں۔
ان کا کہنا تھا کہ پاکستان دنیا کی تیزی سے ابھرتی ہوئی معیشتوں میں سے ایک ہے، پاکستان نہ صرف اس خطے بلکہ پوری دنیا میں سرکردہ ممالک کی صف میں شامل ہونے کی صلاحیت رکھتا ہے۔
زیک ویٹکوف نے مزید کہا کہ خطے میں اور عالمی سطح پر امن کے قیام میں پاکستان کے کلیدی کردار کو سراہتے ہیں۔